এই লেখাটি 610 বার পড়া হয়েছে

পরাকবাল কালাধন

পরাকবাল কালাধন
মৃত্তিকা চাকমা

– কালাধন কুত্তুন এযর ?
– কুত্তুন এ্যাম! আলু কুরো যেয়ঙ্গে।
– অঃ চাঙ, কি কি আলু পেয়স ?
কালাধনে বুগিব’ মাধাত্তুন লামেই শিলপেদা আলুয়ানি ঘাদি ঘাদি চায়। আ কুল্যাঙত্তুন আলক আলক গোরি চায়।
– আ- এধক কিয়ে লিত্তিং লিত্তিং আলুয়ানি কুরি আন্যস্? দাঙর চেই চেই কিয়ে-ন’ কুরচ।
– আ- মত্তুন কি মনে ন’ কত্তে দাঙর দাঙর আলু আনিবের। ন থেলে কুত্তুন পেম। ঝার জঙ্গল বেগ্ ধুও ওইযার। ভগবানে যা আহ্ধত তুলি দের সিয়েনী আয়।
যাই ওক- কালাধন, মুই কোয়েং আলু বন্ধাব নেযাংনি তুই পান আলুনি বেচ্ছেই। তেঙাউন পরেদি দিম আয়।
কালাধনে ঝার’ তোনপাদ, আলু কুজু তোগেই বিগেই সংসারান চালায়। বাংলা দেজর স্বাধীনতা আন্দোলন’ অক্তত্ পাগালা পাদান্যার গুলি মুওত পরি তা বাবে মরি যায়। তা বাবে মরি যানার তিন বঝর মাধাত তা-মা মরি যায় থেঙত উক্ক শাল ফুদেই। ডাক্তর বৈদ্য ভালুক বাবত্যা চিকিৎসা গরানার পরও তা-মা রক্ষা- ন’ পায়। বেজারী আঙুল্ল পুজ সমারে তাজা লো অহ্রন ওই ভালুক বঝর কষ্ট ভূগ গোরি একাল সারি যায়। সিত্তুন ধোরী কালাধনে গায়। মা-বাবর বানা এক পুও। তা-দাঙর পিজেঙে মন্দাধরিই তারে দাঙর দিঘোল গোরি বৌ উক্ক আনি-দি ঘর সংসার তাঙে দে;। আদাম্যায় দিন পলিয়ে কামত দাগিলে দ্বিবে খেল’ আ-ন’ দাগিলে ঝারত্তুন তোনপাদ তোগেই বাজারত বেজি-কিনি সের মুল’ চোল, আধবেয়্যা সিজিলিত গোরি কেরানজিত তেল, ইত্তুক জেত তেল’ সিঝিলিত ইত্তুক কিনি আনে।
কালাধনে বাজারত্তুন ফিরিবের কাদাল্যা তা- ঝি পুওনে পদ’ হত্যা চেই থেদাক। ডাঙর ঝি ঝেদরী কয়-
– এচ্যা বাবা মত্যায় গাদনী কানি এক্কান আনি দিব’।
– মরে কি আনি দিব’ বেবেই?
– তরে রাঙা রাঙা তিলোকপাত্ত বাঙরী আনি দিব’; তে পেন্দলং আনি দিব’?
– চিজিত্যায় লেবেন জুজ আনি দিব’। আর’ উহ্রুম আনি দিব’।
– বেবেই, বাবা কক্কে এব’ আ-দ’ বেল ডুবেল্লই!
ঝেদরী লোই কান্দরী তা বাবে বাজারত গেলে কি কি আনি দিব’ সিয়েনী কোই কোই পদহেত্যা বাচ্ছেই থেদাক। মুগুজো গাজর পাদানি আহ্ধ খুলুং গোরি ফুং ফুং ফুদেক।
বেলান রাঙা চিকচিক গোরি মুরো লেজাত পরেল্লোই। হাক্কন পর কান্দরী কিজেক কারী কয়-
– উইও বাবা এযের!
– অয়ও বাবা এযেত্তে !
ঝেদরী আর কান্দরীর খুঝীর ভর-ন’ ধরে। তা বাবরে কিজিঙ’ মুরোবো উত্থে দেঘী তারা বাপ্প মুরো উধি ফুরেই দ্বিভোনে দ্বিয়েন আহ্ধত ধরিলেক। তা বাবে কুল্যং বুক্যা গোরি ঘর মেক্যা ধোরা ধোজ্জ্যা গোরি ঘরত গেলাক।

কালাধন’ ঘরান আলকদিএ্যা বাজ ঘর। সাচাঙুয়ান উত্থে শলাত কালাধন’ মোক্কে চন্দ্রমোঘী কুল্যাঙ্গ ধরি ঘর’ চানাত নিল। সমারে সমারে ঝেদরী কান্দরী বেক্কুন চানানত কুধুম অলাক।
– বাবা ম’ কানিয়েন আনি দোস্যা ?
– কত্তুন আনি দিম মা শিলপেদা কোয়েংআলু তেঙাউনও ন’ দে-গোই।
– বেভেই কত্তে মরে ভিলে রাঙা রাঙা তিলোকপাদ দিএ্যা বাঙরি আনি দিবেদে, আনি দোস্যা বাবা ?
– না-দে মা, তমারে কিচ্ছু আনি দি- ন’ পারঙর। চোল দ্বি-সের আ কেরানজি তেল এক্কা জেত তেল এক্কা আনি পাজ্যঙ্গে। এযেত্তে রবি বারে তেঙাউন দিব’ কোইয়্যা দ’ এসিন্যা আনি দিম- দে!
– বাবা হামাক্কাই আনি দিজ সিএ্যা, কানিয়েন গোদা ফাত্যা, গাধা গেলে বানা ভেরেত ভেরেত ফাদেদে।
– ওইয়ে-ন’ ফাদিব’ আর’। ত’ মা গমে দালে শিলেই দিব’।
– বাবা মরে বাঙরি আনি দোজ ?
– কান্দর মামা, বাঙাল্যানিহ্ দ’ বাঙরিয়েনী ভিলে এজ’ ন’ বানায়। এযেত্তে বাজারদিন্যা ভিলে বানেই ফুরেলে আনি- দিব’।
কান্দরী খুব খুঝী অয় তা বাবর কধানি শুনি। তার খুব আওঝ তিলোকপাদ দিএ্যা বাঙরী পিনিবের। গেল্লে বঝর চিরিঙি তা ঝিবোরে এক জোরা তিলোকপাদ দিএ্যা ঝিমিত ঝিমিত জুলেদে বাবত্যা বাঙরি আনি দি তা-ঝি পহ্ন চোগী খুব আওঝ পিনি বেরেদ। তা- সমাজ্যা কান্দরী দাগি ভারী দোল দেগিদেক। এ্যা সিত্তুন ধোরী তাবাবরে তিলোকপাদ দিএ্যা বাঙরী বাজারত্তুন সারা দিদ’। হালিক তা বাববে কালাধন্যা আনি দিব’ কুত্তুন! বেন্যা খেলে বেল্যা নেই বেলে খেলে বেন্যা নেই। তোন পাদ বেজিনে যে তেঙাউন পায়-সিগুন সংসার খরজত্যায়ও ন’ কুলয়।

কালাধন্যা ভাবে এ সংসার কিঙিরি কাদেব’। আমক অয় এ অকুল দোয্যা কেনে কুলেব’। ঝেদরী মা এক্কা দাবাবো বাজানা। তোন পাদ তোগেই আনিলেও আদামত্তুন বাক্যা রাগান। তেঙাউন মাগিলেও ন’ দোন, আ বেজ মাগিলে আঝুকরান।
– বেল্যা মাধান সুভাস্যা বাবে এস্যাদে বারাহ্ বানি দিব পারিবঙ- কি-না।
– কি কলে ?
– কোয়োঙ্গে ঝেদরী বাবে বাজারত্তুন এলে তেম্মাং সুল্লুক গোরি তরে জানেবং।
– কয় আরিহ্ ?
– বার’ আরিহ্ ভিলে। রবিবারে ভিলে বাজারত চোল নিভেক। তা-পুও ফেল্যারে নাকি তেঙা জোরেই দি-পাদন। কি ভিলে আই-এ পরীক্ষা কাজাল্লিদে।
– আ শনিবারে তোনপাদ তোগাত্তুন ঝাদি এ্যাই খেইদেই রেদোত বানি দিবগঙ্গইদে আয়।
– পারিবেনী ? অহ্রান  ন’ অভে ?
– বাজাদ’ পরিব’। ন’ দেঘস, কান্দরী কয়দিন অল’ বাঙরী একজুর মাগেত্তে। এবারত লোই দি-ন’ পাল্যা- দ’ মন দুগ পেব’। ইন্দি দাঙরবোর গাদনী কানিয়েন যার ফাদি। ভাদ রানা অহ্লে বাল্লোই যা খেদং মালে।
তারা দুও জনে গুদিত গেলাক। ভাত খেবাত্যায় ঝেদরী মা থাল কদরা ধল্লোই। কালাধন ঝেদরী বাবে পলত পলত দাবা টানের। তারা ঝি পুওনে ভাত খেবাত্যায় মেক্কের মেক্কের গোরি বোই আঘন। ভাত খেই ফুরেই থাল কদ’রা সমরী ঝি-পুওনরে থুমত ফেলেই সুভাষ্যা বাব’ ঘরত বারা বানা যেবাত্যায় যুক্কলদন।
– আ বানা এক্কান কুলো ললে ?
– তারাত্তুন থেব’।
– তারাত্তুন থায় ভিলি! আজের-ন’ থেলে, দুগ পেবেদে য তুই। সুব চাব বাদে উভোনও ল’।

আন্দসোভা আর’ আগেদে কুলন ঘর’ ভিদিরেত্তুন আনেগোই। জার’ মায় কালাধনে গাঞ্জা পিন্যা ঝেলাং ঝেলাং বোরগী এক্কান কেয়্যাত বেরেই বারা বানা যেবাক। সমারে কালাধন্যা আহ্ধত বাজ্ দাবা উক্ক।
– কালাধন এলাদে ?
– অয়- দা। গম ওইয়্যা রেদোত এলাদে। বেন্যা রাদা ডাগত এ্যাধা দুগ্ বেজ অলুন। কোই, সুভাষ্যা মা, কালাধন্যা দাঘী এস্যন চুগুনো ধানুন কুগুন দেঘেই দেগোই।
গুদি ভিদিরেত্তুন সুভাস্যা মা এল’।
এ্যাই এ’ ইয়দ দ্বি কুল্যাং। আ ইয়দ’ দ্বি মারাল্যা। উন্দি সিগুন-নয়।
– ওইয়্য আয়। ঝেদরী মা এক্কা তুলি দেঘী।
ঝেদরী মা কালাধন্যারে ধান মারাল্যাউন কানাত তুলি দে। আ সুভাষ্যা মা বুগেই দে ঝেদরী মারে এক কুল্যাং। কালাধন্যালোই ঝেদরী মা পুন্যা পুন’ পুন্যা গোরি ঢিঙিশালত গেলাক।
– আন্দশোভা তুষ ন’ থান পারা চোলুন এক্কা গমে পোজিজ্ বুঝো।
– অয়দে ভূঝি।
– গুর’ উনরে কি ঘুমত ফেলেই এস্যদে ?
– ইঁ।
– আ কালাধনে -দ’ বানাহ্? ফেলফেল্যা এক্কান কাবরলোই। মারে আ জার ন’ গোরিব নে!
– নাদেই ভূঝি হাক্কে অহ্লে ঘাম নিঘিলিব’।
– অয়্যাআয় সালেন। তুমি লারে লারে বান’ নি। মুই য ঘুম- ন’ যেম, সুদো তুম গরঙর।
– অয় ভূঝি তুই যা, জার-ন’ খেজ।
কালাধনে কধায়ান কনার সমারে সমারে সুভাষ্যা মা ঘর মেক্ক্যা যেব’। কালাধন্যা ঢিঙিত একথেংগই উধে-লামে। উন্দি আন্দশোভা ওঘোইবোর চেরপালাত্তুন ওগোলেইএস্যা ধানুন কোজেই ফেলেই দিব’। ধাগেদি ছেরাক্ক বোয়েরে মিরমির গরে। এসান্যা গোরি রেদ সংভাগ ওই-
– আ এক্কা চিজিবো দাগিরে চেই এধেগোই-দ’ অধ’। এক্কা দাবাবোও বাঝেই আনি পারিবে। যা-না-
– তত্তুনও এ’ দুগ’ মায় দাবা পরানে মাগে।
– আ দাবা ন’ খেলে কি খেম।
– কেয়্যান দেঘর নি’ হেঙেদা অভার-দ’ জাগা নেই।
– ইয়েন-দ’ কন’ দাবাবোলোই নয়।
– সালেন ইজ- খেই- ন’ পর কিনে আরুং কারুং ওই আঘস্যা!
– আ ঝেদরী মা, তুইও কিয়ে সিয়েন কজ! সংসারাং- দ’ বানাহ্ মর নয়, তরও দ’। সিঙিরি যুদি কজ ভগবান্যা অভিযুক্ত অভ’- দ’। কাম গোরি-দ’। কন-দ’ ধেং বাজি গোরি-ন’ খের।
– এ্যা সেনত্যায় কঙ্গে, ভগবান্যা যা-দর সিয়েনী খেইনে যেনে সংসারান সুগর গোরি পারিয়।
– ওইয়্যা, ওইয়্যা, ইভে ওলেনে চিজি উনরে চেই আয়োই, ইন্দি মুই আল্লস্যা দি-দি, বানিম।
আন্দশোভা ধানুনু ওলোই আর’ এক ওগোই ধালি-দি বৈদ্যাত্তুন উধি পিনোনান তুচ্চ্যানি ঝারি মাধার হবংআন ফুয়েই এক ঝারান-দি যেব’
– ধাননু ওগোলেই গেলে ঝাবেই দিজ্ সিএ্যা।
– ওইয়্যা ওইয়্যা, মুই দিম।
আন্দশোভা যেব গোই। হাক্কন পর কুগুর ভুগনী-র’ শুন’ যেব’। কুগুর’ ভুগনী-র’ শুনি সুভাষ্যা মা উক্ক চেরাক ধোরি এব’।
– আ ত’ বৌ-বো কুধু গেল’?
– এক্কা ঘরত যেইয়্যাদে। গুরউনরে চেই এযেল্লোই-দে।
– ভুজুঙ’ দিন’ মায়। আর’ সিত্তুন রেদো মাই, আ-কিত্যা গেল’ চেই।
– কি অভ; ইয়ত্তুন ইয়দ। যেব’ও এবগোই। কুগুর’ল্ল।
– মুই-দ’ আর কুগুর’ ভূগনী-র’ শুনি তমারে চাঙল্লি-দে। আ কুধুক্কুন আঘন?
– বেজ্ ন্ েআর’ এক মারল্যা সেয়ান্যান অভাক্কে।
– আ-ন’ ফুরেলে থ-দাগোই-দ’ অধ’।
– থোক ভূঝি, এক্কুয়ারে ফুরেইনে ঘুমত পরিবঙগই।
– রেদও ভালদ্দুর অল! ঝেদরী মা এলে উঘুন ঘরত তুল্যাগী। বেন্যা বাজারত যেবার আক্কে এক্কা পোত্যা এ্যাই বানি দিলেগী অভ’। ইক্কু আর ন’ বান্য। মুইও ঘুমত পরিম্মে ইয়ে।
– আচ্ছা ঝেদরী মা এযোক্কোই। ভূঝি তুই ঘরত যা। আমি এভেনে যেবঙগোই।
সুভাষ্যা মা ঘরত গেল’। কালাধন্যা ধানুন ওলেই ওলেই বানের। ঝেদরী মা’র এবার কন’ খবর নেই। কুগুর ভগনী র’ শুনিলে কালাধন্যা ঢিঙিতহুচ ন’ দি অলর গোরি শুনি থায়। মনে মনে ভাবে- মহ্ধন গোরি শুনি থায়।
-আ-এচ্যা কিয়ে কুগুরে ভুগুদন ? অন্য দিন্যা-দ’ সেধক শুন’ ন’ যায়! ঝেদরী মা এদ’ ঝাদি চলুন ঝারি পুরি এক্কুয়ারে ফুরেই ঘুমত পত্তঙগই! নিশ্চয় গুর’  ব’ জাক্যা পারা পাং!
কালাধন্যা আর’ বারা বানানাত থায়। ইঙিরি ইঙিরি বাগী মারাল্যাবো ধানুন বানি ফুরেই তুজে-ধানে চলুন এক কুরেদি থয়। আ ঝাজ্যা চলুন উক্ক কুল্যাঙত তুলে। হাক্কন পর পিজেত্তুন-
– ঝেদরী বাপ; ও ঝেদরী বাপ!
– ঝেদরী মা, আ কি ওইয়্যা ?
ঝেদরী মা ঝেদের কেদের চুল, আর পিনোন খাদি পাদা চিজ্যা গোরি দেঘি কিজেক কারে-
– কি ওই ওই ঝেদরী মা ? ঝেরী মা কি ওইয়্যা ?
– মানুষ! মানুষ! মানুষ!
– ঝেদরী বাপ মরে রক্কে গর। মরে রক্কে গর।
– কি ওইয়্যা ক-না? ও ভুঝি সুভাষ্যা মা ও দা সুভাষ্যা বাপ!
গভীন রেদোত ফুয়ং গুজুরেই ঝেদরী বাপে দাঘী কয়-
– ও দাদা, সুভাষ্যা বাপ, মরে এক্কা চ’গী। ম’ ঝেদরী মা নেই নেই নেই।
কভাল ভরাত ভরাত চাবারায় বোয়ের আর চেরাক্কর তেল ফুরেই চেরাক্ক মরি যায়। কালাধনে আন্দারে বান্দারে বিলাপ গোরি সুভাষ্যা বাপ আ সুভাষ্যা মারে দাগে। হাক্কন পর সুভাষ্যা বাপ আ সুভাষ্যা মা উক্ক চেরাক ধোরী এভাক। এ্যাইনে কালাধন্য করত ঝেদর কেদর গোরি মুরগুঝি আঘে ঝেদরী মা আন্দশোভা।
থুম- রেদ ১২.৩৪মিঃ

-০-

Print Friendly

এই বিভাগের আরো লেখা পড়তে নিচের দেওয়া শিরোনাম এ ক্লিক করুন

Subscribe to Comments RSS Feed in this post

One Response

  1. Its realy a taugh job to write chakma literature. I want to wish the writer and expect more writing from him.

আপনার মন্তব্য প্রদান করুন

আপনার ই-মেইল এ্যাড্রেস প্রকাশিত হবে না। * চিহ্নিত বিষয়গুলো আবশ্যক।

*
*