এই লেখাটি 1,077 বার পড়া হয়েছে

হিল চাদিগাঙর কাবিধ্যেং কবি মৃত্তিকা চাঙমা দাগীর ইরুগর কবিধ্যা বোই এ্যাংকুর ফগদাঙ অনার পয়দ্যানে দ্বিয়ান কধাঃ

হিল চাদিগাঙর কাবিধ্যেং কবি মৃত্তিকা চাঙমা দাগীর ইরুগর কবিধ্যা বোই এ্যাংকুর ফগদাঙ অনার পয়দ্যানে দ্বিয়ান কধাঃ- শ্রী প্রগতি খীজ্যা

 

হিল চাদিগাঙ চাঙমা জাদর পত্থম চোইদ্যাল রেজ্জ্যের মাদি। এ রেজ্জ্য্তে চাঙমা জাদর জিংকানীত গঙে থেয়্যা নানান বাবদর ফারাদজা। নানা বাবদর আরাচ্ছাগ গঙে এয়্যা কিজিম্যা কিজিম্যা। রাজা আরেয়্যা দেঝ। প্রজাউনে আরেয়্যেন নিজর দেঝর মাদি, গাঙ ছড়াছড়ি চিবুং তারুম বন। ৪৭ সালত দেঝ ভাগ অল। বরগাঙর বুগত গদা দিল পাকিস্তান সরগারে। ঝাগে ঝাগ উলোমস্তো অলাক নিধুগথুগ কবাল্যা চাঙমাউনে। নিজর চৌইদ্যাল গচ্ছ্যা রেজ্জোর মাদি গাঙ পানির মেয়্যাদয়্যার খাদনাল সুদো ছিনি উমর কালত্থ্যায় লর দিলাগ ভিন জাদর দেঝ গাঙ ভারদর তিবিরে রেজ্জ্য, নেফা আ কুগী রেজ্জ্য মিজুরামত। যে আধং মানেই চাঙমাউনে আত্তিয়া বরঙা মা বাবর শবাশালর মাদি পানির মেয়্যা ছাড়ি ন’পারি নিজর আরনা রেজ্জ্যেত থেই গেলাক তারারে বলবলা জাদগর বাঙালর নানুগিরি চেলাউনে ঘাদ আঝার খেলেও ফুরিন’দেলেই নিজরে চাঙমা ন’ কয়ন্যায় বাঙাল অই যেবার সল্লা দিলাগ। ছিয়ান মানি ন’পারিল্যা অকাল্যা তুট্টিয়্যা বয়ারত উড়েই দিবার কলাগ। লারমা বাবু চোগত শষ্য ফুল দোবল। ঘুরঘরে সাদপাগ খেইন্যায় চোগ রাঙাগরি দাঁদ ভিড়ি হ্ল চাঙ ছালেই। আমি অলঙ চাঙমা জাদ, হিঙরী বাঙাল বানেবা ছা’জোগ। মুইয়ো এগপল্লা ছেম আ’ তুমিও ছেদাম বাজেই ছ’ হিঙরী বাঙাল বানেবা আমারে? যে কধা সে’ কাম লারমা বাবু দাগির। থাগল কোদাল ফাঙারা থুবোথাবা গরিলাগ। চাঙুদ লামিলাগ জিদেজিত্যা কামত। মুরোমুরি ফোঙ গুজুরি তুলিলাগ। রঙোনী অল এ্যাল মুড়োমুড়ী, চেঙে মেয়োনী, রেঙখ্যং, শঙগ, ইজোমপুদি, সাজেগ, লোগাঙ, পুজগাঙ, ছড়াছড়ি নাল। পোড়বুয়্যা পন্ডিগ কবিউনে লিঘিলাগ জাদর বিজগর কধা। লিঘিয়্যাউনর লেঘা মাদেইন্যায় উজগুজ ফিরে ফেলাগ টম্বার গাবুজ্যা পোয়া ছাবাউনে। লো’ গরম অই উদিল তরাত্তুন। সে গঙত চোদু অয়ন্যায় বাঙালা সরকারে ১৯৯৭ ইংরেজত ২ ডিসেম্বরত শান্তি চুক্তি নাঙে এক্কান চুক্তি গরিলুয়্যা।
শান্তি চুক্তি অল। লাড়েই চেয়্যা জাদর ধবা কাদি জমা লোই ফেলেল, সরগার নানু হাসিনা। নেই-রে পোড়া কবাল। চুক্তি মুজিম ফল ন’দের সরগারে। দ্বি’ভাগে ভাগ অলাক মুড়–ল্যা পোড়াকবাল্যা জাত্তুনে। সরগারর ন্যুহ কাবোগত পড়ি আমি জাদে জাদে চাংছারা লুগিবিত্ত্যায় বরুজ তুলির। কবি মৃত্তিকা বাবু দাগীর চোগত ছেরাং ছেরাং চোগর পানি এল। জাদর মন রিবেঙ্ত ন্যুহ গরি লাড়েয়ত লামিবার সাম্বাদ দিবের পয়দ্যানে “এ্যাংকুর” নাঙে কবিধ্যা বোই ফগদাঙ গচ্ছ্যা গেল্লে বিঝুত (২০১০ ইংরেজিত)। রংচঙ্ঙ্যা বোইয়ো পত্থম ডালানানত কিরগী কানাদি ইক্কুয়্যা চাঙমা গাভুর মিল্যা আরুগ জাগা ফেয়্যা দেঘা যায়। আরুগবলা মিল্যাবুয়্যা যেন বানাবান্ন্যা জিংকানি লাধি মারি ফেলে যেই পেগোচান উড়ি যেদ চাই। কবিধ্যা বইয়ো নাঙাত শুনিল্যা আ’ ডালান দোঘল্যা পটফট্ট্যা গরি বুজিপারে কবি মৃত্তিকা বাবু কারে কি অদ্ চেয়্যা। বোয়ের পত্থম কবিধ্যাবুয়া নাঙ অলদে “এ্যাংকুর”। কি কবার চেয়্যা কবিয়্যা সেনত্ত্যায় পত্থম কবিধ্যাবুয়া ইয়োদ দ্বি’ চেলুঙ-
আহ্ধি যাদে পধোদ আহদে আহ্দ ধরি
কধা কোই একতাল
হিয়েল নেই কি এলং কি পেলং
এ্যাংকুর জন’মান।
থেং ন’পত্তে হারকুজ্যা জন’মত
কিত্তর মানাত ন’এল’ তক্কানত
বেরেদং দ্বি’জনে সাগর দোব্যাত মনর ইধ ভাঝেই দি
এ্যাংকুর পরি- দ’
লেভেই উদে মনানে শিরেই শিরেই বেই যায়
থোক থোক জন’মান এযান ওই
জীবন চালেই গঙেই যোক এবর চেই লঙর।

Print Friendly, PDF & Email

এই বিভাগের আরো লেখা পড়তে নিচের দেওয়া শিরোনাম এ ক্লিক করুন

আপনার মন্তব্য প্রদান করুন

আপনার ই-মেইল এ্যাড্রেস প্রকাশিত হবে না। * চিহ্নিত বিষয়গুলো আবশ্যক।

*
*