এই লেখাটি 1,328 বার পড়া হয়েছে

জাপান্যবলী

জাপান্যবলী

(এই গল্পটি বিঝুফুল৩য় সংখ্যা ১৯৮২ খ্রীষ্টাব্দে প্রকশিত হয়)

ভুলঙতুলী আদামান চেঙেপারত অণায় বেন্যা-বেল্যা এক চিদজুরোনি দৃশ্য ফুদিদো। চেঙে- পারত বেল্যা অহ্লে গাবুয্যালগে জধা ওই বোলী খারা খদাক। সে বাদেও নানা খারা খেলিদেক। খালিক যিয়েনি খন্  সিয়েনি কন’ তারার নিদিষ্ট খারা ন’ অধ’। কন’ উক্ক শিগেয়্যা ঘ পরেয়্যা ন’ থানায় যার ফলে খারা কেত্যা কন গম নাঙ নেই।

এন সময় একদিন আদাম’ প্রাইভেদ মাত্তচ্যা গাবুর লক্কুনরে দাগিনে কল, তমারে পত্তিদিন বেল্যা অলে ধুল্যা চরত দেঘঙ । খারা অহ্দে তুমি যুদি রাজী থাগ’ সালেন  একদিন মিঝেল-হঝাল গোরি পিড় গনাগনি খারা খবঙ। মাত্তচ্যার কধায় গাবুর লক্কুনে রাজী অলাক। সিত্তুন ধোরি পত্তিদিন নিদ্দিষ্ট’ খারা অহ্দাক, বেলান তিন পহ্র তলাত পলে। এ সান্যা গোরি পত্তি বজর নানা বাবত্যা খারা বোজেদাক, আর অন্যান্য আদামত্তুনও ভারী আহ্ওঝে খারা খুও এধাক। এনে এনে বিরেট বিরেট গোরি নাঙ সরি গেল ভুলঙতুলী আদামর বোলী খারা কধা।

আদামর নাঙ সরানার সমারে সমারে চেঙে উজোনি দিন দিন পানি বারি গেল। এন্কি গুলো কদক মানুচ সারা বাগী মানেয়ুনেও খবর ন’ পেদাক এ পানি কুত্তুন এযের, কিঙিরি, এযর ? কিত্ত্যা এযর ? পানি থাক্কে থাক্কে বারানায় ভূলঙতুলী আদাম ডুবি যায়। চিদে পরি গেল আদামর মানুচ্চুনর, কিঙির বাজিবাক । দিন দিন ডুবল্লি ঘরর আহ্মত্তল।  মানুচ্চুনে খুব বাচ্চেই চেলাক পানিয়েন কন’ লামি যায়নি। পানি লামিবের কন’ ভ’ ভাক্কা নেই। উবয় ন’ দেগি আদামম্যাউনে যে যিন্দি চোগে পহ্র দেগে, বাজিবের উবয় দেগে, তে সিন্দি পজাবিরে ভূদিভক্সা গোরি পরান বাজেবার নাঙে আদাম সারি সাঙু লামিলাক কাদিমাস্যা বড়ব বোয়ের পেগো সান।

মাত্তচ্যার খুব আহ্ওঝর পরবো পুও জাপান্যা যক্কে আদাম সারি পার, সক্কে হারহুস্যা অল্লী তারার সেই পুরোন আদামার খারা মন-দি চেদ’ । মনে মনে তাত্তুন ওস, দাঙর অহ্লে তেও তারা সান্যা একদিন খারা খব।মাত্তর সেই ওস তার  দোয্যাত ডালি যেইয়্যা, কারণ তারা ইক্কু যে আদামত বোজোত্তি দোন্ন্দি  সিয়েনত সেয়ান্যা পরিবেশ  নেই, সে বাদেও আদাম’ মানুচ্চুন অলাক, যারে কয় খুব মুরুল্যা, অঘা। এনে এনে জাপান্যা সেই পরিবেশেত থেইনেও  দুঃখ বিষ্ট গোরি পরান বাজে পারা লেঘাপড়া শিগিল’। দাঙর দিঘোল অল। জাগা জমিন নেই। দ্বিবে পয়য্যা। ধরিবের তা’ বাপর কন পধ নেই। পরিবের ধারত উধিনেও জাপান্যার উবর পরা-শুনা আর ন’ অল’ যার ফলে বাদ্যই জীনকানি বাজেবার জীবন লারেয়ত লত দিয়া পল’ । দুগে সুগে বঝর মুলো কাদেই, গুলেক ভাত পানি ঘরত তুলিল’। মনে মনে  ভাবিল সাংসারিগত সোমেবার । উন্দি তারা আদাম কার্বাস্যার ঝি মানেকবীও জাপান্যারে কোচ পেদ । এন সয়ম মাণেকবীরে তা’ বাপর দাঙর পুদো বৌ ইঝেরে ঘরত তুলিলগী। মাত্তর এক বঝর বিদি ন’ যাদে তা বাপে জীনকানিত্তুন জনমত্তা সাতনাল ছিনি গেল।

তা’বাবে মরি যানায় জাপান্যা বিরেট ভাঙি পরি বেয়াল অই গেল’। চিদে পরিগেল এজাগুলুক সংসার কিঙিরি বুজ দিব’। ইন্দি তা’ মোক্কর  গাওলী অঙ অঙ। জাপান্যা দিনভর ভাবে, আর দিঘোল দিঘোল বহ্নিজেচ ইরিদে। সেরে সেরে গুণে কি যেন সরান ধারাজ গোরিদো। সেই দেজকুলর চেঙে পারর গুদুখারা, পোর খারা, বোলী খারা মনত তুলিদো। মনে মনে ভাবে ইক্কু যুনি সেই দিন্ন থেদ, সালেন কম্বা সুগে দিন কাদেদ’। আর তার সেই আঝা পুরেদ সেই খারাত যোগদিনে। মনে মনে পানিয়েনর কধা চিদে গরে। এই পানিয়েন এযানায় তারার রাদ আনি দিয়ে । মনে মনে আধিক অগমানে কয়, আহ্  যুনি বোলী অধুঙ এই রাজগদা পোরেই মানজার সরান আনিদুঙ।

তেহ্  এই চিদে সাগরত ভাজতে ভাজতে তা’ মোক্কুর  গাওলী ওইয়ে উক্ক লুধুরুঙ কুধুরুঙ মরদ পুও। জাপান্যার মনদুগ আরো বারী গেল, সেই মনদুগ’ সেরে তার পুওর মু চেবাত্ত্যা গেল। তারা ঘরত যে উক্ক নুও গরবা এচ্চ্যা তার কন’ খুঝীর ভাপ নেই। আহ্ঝির বাপ নেই। দিন দিন তারার  পরিবার আহ্ দাঙর অণায় জাপান্যার মনর চিদে গারু অর।  এনে এনে জাপান্যা যে অক্ত অক্ত কুধু যায় তারা ঘরত কিউয় কোই ন’ পাত্তাক। তে যেদ উক্ক বৈদ্য সিদু। বৈদ্যবুয়র নাঙ জজ সোরেইয়্যা  দেজে-বিদেজে । ধত্ত গেলে তেহ্ উক্ক রাজবদ্য। সেনে তা ইদু বিদ্যা শিগে যায়। বেন্যা যেই সাঝন্যা মাধান চড়াত যেইয়্যা পেঘসান ঘরত ফিরি এদ’।  ঘরত এলে ঈনজীব গোরি অনুসুর থেদ’ কি যেন চিদে সাগরত সাজুরে । মনে অয় যেন তে-উক্ক সাধু সন্ন্যাসী। কাজে কাজে গুরু ঠাগুর বিদ্যা প্রায় শিঘে অল্লী। ইন্দি ঘরর অবস্থাও যারে কয় ভেরগদি ওই আঘে। একদিন তা’ মোক্করে কি আধিক্যাগোরি খুজী পুক্ক উধি কল’, মুই  যুনি কনবার ঘরত্তুন ’ বিদেজ খেলা লামঙ, সালেন মত্যা কন চিদে চর্যা ন’ গোচ্ছ্য, চিজিবোরে গমেদালে চেইও। মানুজসান মানুচ অভার পত্তান ধেগেই দুও। যেনে তা’ পরান তে বাজেই পারে।
জাপান্যার বিদ্যা শিঘে প্রায় থুম ওইয়্যাগি। একদিন তারা বাজারত ঢুল পিদিলেক, এযেত্তে শুক্রবারে জান্ন্যাব’ আদামত বোলী খারা অভ’। একধা শুনি জাপান্যা মনে মনে খুজী অল’ এবার সাদেকামে মিলি গেল তার সেই চিগোনো লক্কে দেখ্যা বোলী  খারা অহ্বার। ইন্দি তার বিদ্যা শিগেও থুম ওইয়্যাগি। মানসিকভাবে তিওর অল’ বোলী খারত ফিবেক দিবেত্ত্যা।

ঠিক সময়ে খারাত আহ্জিল অলগোই। শুরু ওইয়্যে বোলী খারা। সেই  খারা দেই তার সেই চিগোন কাল্যা চেঙে পারর কধা ইধোত উধিলো। উন্দি মানজ্যের ফোত। খারা প্রায় থুম ওই এযের। বর বোলী ঘোষনা গোরি দিলেক, যে  এ  খারানত বেক মানুচ্চুনর পিদ বাজেই দিয়্যা, সভাত ঘুরি ঘুরি দাগি কধন, কন্না, কন্না আঘে, যে এই বর বোলীরে পিদ বাজেই দি সোনার মেডেল ছিনি নি পারিবো। উধি এয সাহ্জ থেলে। কিউয় নেই বর বোলীরে ধরিয়্যা। হাক্কন  থেই ঝাগ’ সেরেত্তুন জাপান্যা মানগুজদি নিগিলিল। আদাম্যাউনে দেই এক্কুয়ারে, আমক অলাক। কিয়ে কিয়ে থেঝেরা গোরি কধন, আ; ইতে কমলে কমলে বোলী অল’। আ কিয়ে কধন সেদাম নেই যার তিন মোক তার, ইয়েনিরে আইয়্যা কয়দে দা-কধা।

রণ’ হলাত গুরুং গুরুং বদ্দুল বাজের। উন্দি ধু-উ-ম ধু-উ-ম গোরি হাবোই গোলাক ফুদোদন। হাক্কন পর  অল’ বড় বোলী লারেই। ভালক্কন  সঙ পেজো উগুরে পেজ, থেঙর দাবী উগুরে দাবী দিয়া দি  গত্তন, কিওয় কাররে ফেলা  ফেলী গোরি ন’ পাত্তন। উন্দি বাজের গুরুং গুরুং বদ্দুল র’। যার পে তেহ্  কিজেক সাত্তন, নিজ খেয়্যাত বল হিত্তন। হাক্কন পর জাপান্যা এক পেজে সন্দুল  গোরিলো সেই খারাব বর বোলী বুওরে। আদাম্যাউনে এক্কুয়ারে আমক। শুরু ওই  গেল জাপান্যারে পাততুরু পাততুরু জানানা। মানজ্যের কিজেগে রন’ হলা আর ভরি যেইয়্যা। ভোলোন্তী আরুনর বলে লাহ্রে লাহ্রে গোরি রণ হলার জাগুলুক থামেই বড় বোলীর সোনার মেডেল গত্তনাত পিনেই দিলেক। তারপর জাপান্যা হাক্কন জিদর নাঝ  দেগেল।

জাপান্যা তার সেই ভালকদিনর সাধনার ফল গোঝিলোই মনে মনে কল’ যেই খারা চিগোন’ লক্কে  দেই এচ্চ্যং, সেই খারা এচ্যা খোই মুই জিদিলুঙ। জাপান্যা খারাত জিদি পারি মন এক্কেনা সুনজুক ওই এল’। কারণ সেই খারা তেহ্  চিগোন লক্কে চেই এচ্যা, বরগাঙানে ডুবেই নিনে তার আর কনদিন দেঘানা ন’ অল’। কই ন’ পেল এচ্যা তে- মনে অয় যেন সেই  রাজগধা ফরেইয়্যা। এনে এনে তা খারা দেই  দেই আদাম্যাউনেও সেই বোলী খারার কেত্তা মন দিলেক। তারেই সে খারাত গুরু ঠাগুরমানি ললাক। তারপর তেহ্ পত্তিদিন বেন্যা বেল্যা আর জুনপয্যা পাল্লা পাল্লা ট্রেনিং দিদো। কন’ কেত্যাদি যুদি বোলীর লারেই চলে, তারা খামাক্কায় দাবানা ফিবেক দিদেক্কই। ইঙিরি ইঙিরি তারার নাঙ জজ চেরেত্ত্যা সোরেই পল্ল।

একদিন জাপান্যারে হোঝা এলাক সনাছরীত্তুন। সিদু পত্তিবঝর বোলী খারা বোজিদো। কালাবাঘা নাঙে উক্ক বোলী এল, তা’ শিয্যও ভিলে বঙপাদারে  গোরেইয়্যা । তা লগে কিউয় ন’ পাত্তাক। জাপান্যা  সে খারাত  খেলা গেল, মনে মনে  কয়- চাঙ সালেন সেই  কালাবাঘার কম্বা রণ-ঘর বোই আঘে। তেহ্ এধক এ চাগালাত বোলীর  রাজত্ব চালেই  এযেত্তে ? ঠিগ ঠেমে খারা বজিল, চিগোন চাগোন খারা ওই যেই, থুমেদি ওই গেল জাপান্যালোই বড় বোলী খারা।

জাপান্যার এক দাবানা ফিবেগত কালাবাঘা ত-দ-র’। এ্যা সিয়দই কালাবাঘা গুরুতুরু অধিল। সিত্তুনধোরি সে জাগাত্তুন কালাবাঘার রাজত্ব সারানাধা ওই গেল।
এসান্যা গোরি জাপান্যা এক্কুই  বোলী খারায়  খারায়  বাহ্রে দিন কাদার। নাঙ জজ সোরেই ন’ পরে পারা কন’ এক্কান জাগা বাদ নেই। ইঙিরি দ্বি-তিনবঝর বিদেজ খেল্লে খেল্লে ঘর মোকপুয়্যর কধা মনত উধিলো। একদিন সেই উদিজে  আদামত এল’ আদামত লুমিনেই চায়দে  কিউয় নেই। তারা আদামান দাঙদাঙ্যা ওই আঘে। বানা কয়উক্ক পরাা থনির মাজারা ।  পেগ-চেগোরও কন’ র’ছ নেই। গদা আদামান মুচুদো গোরি বেরেই চেল’। হাক্কন পর তা’ ঘরর পরা মুরহামর মাজারা ধোরি দাত ভিরি ভিরি কল, ঘরপাদা শুনি থাক মুই সমত খেই যাঙর, মোক পুয়র ঘর সংসারর মর কন লালোচ নেই। মুই তরে যেদকদিন সঙ সনার মেডেলর চার শিলেই দিন’ পারং সেধকদিন সঙ ত’ ইদু আর ফিরি এদুং নয়।ইয়েন কবুল খেই জাপান্যা ফেয়্যাবো বারাতরোই লাহ্রে লাহ্রে খুচ বাবেই আরো সেই বিদেজ খেলা পধত  লামিল।

জাপান্যা মনদুগ কদিন আর সহ্য গোরিবো। এক সময় বরগাঙে তারার সেই ভাড়োন্দি আদাম ডুবেই নিল’ । সিত্তুন ধোরি শুরু অল, তারার টেঙা পয়য্যা আর ভাদ’রাদ । সিত্তুন ধেই এই কনমদে উক্ক ভিদেত বজত্তি গোরিলেক। সিয়েনও ইংসুগ পরাকবাল্যাউনে পুরি ফেলেইদি সারহার গোরি দিলেক।

ইন্দি জাপান্যা মোক্কু অসুগত পোরি গেল। কয়দিন পেগ’ বাজায়, গারেঙে দিন কাদেবাক। মঝা কুগি কামর  খেই, দারুদর্ম কন যুক্কোল নেই। খানা-দানাও কন ঠিগ ঠিগিনে নেই।  অসুগ তার দিন দিন ঘারু অর। কন উবয় নেই জাপান্যার শালা-শালি উনে কনমদে ধারকর্যগোরি চিকিৎসা গোরিবেত্যা থান ন’ পেইয়্যা জাগাত নিলেক। মাত্তর নিনেইও কন পাদল্ল ন’ অল, অপারেশন গরানার কয় একদিন পর জীনকানির সুগদুখত্তুন তা’ পুও আদেখ্যা গোরি চিরজনমত্যা সাতনাল সুদো ছিনি গেল। সিত্তুন আদামত ফিরেই আনিবের কন জু’নেই। বাদ্য ওই পর’ জাগার আহ্ভা সমারে মিজি যেই পেল।

ইন্দি তা মরদপুয়্যাবুও পত্তিদিন তা মারে তোগায়। তা’ মা ন’ থানায় তা’ বাবরে তোগায়। সেই সেম্বেরা চিগোন পুও মা বাবর বুগ ইরি থানায় নিত্য তোগায় আর গুজুরী গুজুরী কানে। তা’ আজুদাগি বুজ দিবেবর কন ভ’ ভাক্কা ন’ পাদন । বাধ্য ওই তা’ বাবরে হুচ খবরলোই সিদু নিবের ব্যবস্থা গরিলেক।

খালিক সে মুহুর্তে খবর পেলাক  জাপান্যা ঘুরতুরো  অসুগ। কি অসুগ, কম্বা অসুগ খবর ন’ পেলাক বানা শুনিলেক অসুগ তার অসুগ শুনিনে তা’ পুওবোরে নিনেই জাপান্যার শালাবো খবদ্দরা লামিলো। জাপান্যা যে জাগাত আঘে সিদু যেই শুনিলেক। অদরক ছরাত দাগী বিদাগী অই বোলীর লরেই  ওইয়্যে। সে লারেয়ত তারা ভিলে জিত্তন। ফিরি এত্তেসলাত ওতারা এতারারে পধত হাবদি থেই  চোরামের দুওন। যার ফলে জাপান্যা সুওদোই ঘুরুতরো  আহত ওইয়ে। কনমদে সিত্তুনও সমায্যাউনে বুগি আনিলেক। নেই তারা গারেঙত লুমি ন’ থাঙত্তে জাপান্যার র’ চিরজনমত্ত্যা এক্কুই বোলী  খারায় ঈনজীব ওই সেই ঘর পাদার চাল সনার মেডেল দি মোকপুওলোই অদেগাই শিলেই গেল।

তারে জুওদ দাহ্  দেদন  সুওদ  এতেরারে নিলেক। চেরোহিত্যা ঘিরি আঘন তার সেই বোলীর সমায্যাউনে। আর ইন্দি জাপান্যার পুওবুওরে তা’ মামু করত লোই  আগুন ছুও চেই চেই ধেদের ধেদের চোগপানি ফেলেল। তা’ পুওর উভ নেই তা’ বাপে যে বোয়ের সমারে উরি যার। তা’ মামু কিত্যা যে কানের তার কন বুজ নেই। তা’ মামু কান্দে কান্দে কয়, মামু ওই আগুনোন কি গওন ? তা’ মামুর জ্বালা যন্ত্রনা ভাগিনার কধায় আর বাহ্রী যায়। কন’ জ্যোব নেই। বানা দীঘোল দীঘোল বহনিজেচ ইরি দেনা সারা আর কিচ্ছু নেই। থুমেদি লাহ্রে লাহ্রে গোরি গোরি দ্বি-মোল্যা ভাগিনে গারেঙ’ মেক্ক্যা আহ্ধা ধরিলেক।

বিঝুফুল (৩য় সংখ্যা) ১৯৮২

Print Friendly, PDF & Email

এই বিভাগের আরো লেখা পড়তে নিচের দেওয়া শিরোনাম এ ক্লিক করুন

Subscribe to Comments RSS Feed in this post

One Response

  1. Its realy a taugh job to write chakma literature. I want to wish the writer and expect more writing from him.

আপনার মন্তব্য প্রদান করুন

আপনার ই-মেইল এ্যাড্রেস প্রকাশিত হবে না। * চিহ্নিত বিষয়গুলো আবশ্যক।

*
*